ទស្សនៈជុំវិញការអានសៀវភៅ ខែ មីនា 1, 2008
Posted by រចនា in ទស្សនៈទូទៅ.trackback
ខ្ញុំពុំធ្លាប់ចាប់អារម្មណ៍ទេថា ពេលមានមនុស្សម្នាក់ចង់មកខ្ចីសៀវភៅរបស់យើង, ហេតុអីក៏គេសួរយើងថា “ យើងអានចប់ហើយឬនៅ?” ទើបតែពេលនេះទេដែលខ្ញុំយល់, យោបល់ខ្ញុំគឺ “ មនុស្សភាគច្រើនឱ្យតម្លៃលើការអានសៀវភៅឱ្យចប់” ។ ចំពោះខ្ញុំ, ពួកគេនៅមិនទាន់យល់ច្បាស់ពីតម្លៃនៃការអានសៀវភៅ ថាតើការអានសៀវភៅពិតប្រាកដនោះ វារបៀបណានៅឡើយទេ។
ខ្ញុំក៏ចេះតែឆ្ងល់ខ្លួនឯងដែរថា ម៉េចក៏ខ្ញុំមិនអាចអានសៀវភៅចប់អញ្ចឹង? ទោះបីជាសៀវភៅនោះ ខ្ញុំបានរើសយ៉ាងយូរ ហើយចាត់ទុកថា ខ្លួនឯងចូលចិត្តវាជាងគេក៏ដោយ។ តែយ៉ាងណា អាថ៌កំបាំងគ្មានទេ សម្រាប់អ្នកដែលចង់ដឹង។ ខ្ញុំនៅតែអាចស្វែងយល់ពីវាបាន។
ក្រោយពីនោះ ខ្ញុំតែងតែយល់ថា មនុស្សមិនយល់ពីតម្លៃនៃការអានសៀវភៅមានច្រើនណាស់ ព្រោះគេតែងតែសួរខ្ញុំថា “ អានសៀវភៅចប់ឬនៅ?” “ម៉េចបានជាខ្ញុំអានសៀវភៅមិនចប់?”។ មានអ្នកខ្លះ ទិញសៀវភៅស្ដើងៗ ព្រោះខ្លាចអានមិនចប់។ ខ្ញុំចង់តែសួរគេវិញថា “ ម៉េចបានជាចង់អានសៀវភៅឱ្យចប់ម្ល៉េះ?” តែខ្ញុំមិនធ្លាប់សួរអ្នកណាម្នាក់ទេ រហូតដល់ពេលមួយដែលខ្ញុំបានជួបមនុស្សម្នាក់ដែលសួរខ្ញុំថា “ ឈប់អានសៀវភៅនេះឬនៅ?”, ខ្ញុំសួរទៅគេវិញថា “ ម៉េចមិនសួរខ្ញុំថា អានសៀវភៅនេះចប់ឬនៅ?” គេក៏សួរខ្ញុំវិញថា “ ម៉េចបានជាចង់អានសៀវភៅឱ្យចប់ម្ល៉េះ?”។
ត្រូវហើយ! “ ម៉េចបានជាចង់អានសៀវភៅឱ្យចប់ម្ល៉េះ?”។ ខ្ញុំតែងយល់ថា ការអានសៀវភៅចប់ឬមិនចប់, វាមិនសំខាន់នោះទេ។ អានសៀវភៅមួយក្បាលឱ្យចប់ ដោយអារម្មណ៍ផ្ដោតតែទៅលើឃ្លាថា “ អានឱ្យឆាប់ចប់” វាគ្មានអីប្រសើរជាងការដែលមិនបានអាននោះទេ។ តែវានឹងគ្រាន់បើជាង បើយើងអានសៀវភៅមួយក្បាលដោយការចាប់អារម្មណ៍ទៅលើសៀវភៅនោះ ទោះជាអានមិនចប់ក្ដី។
ចំពោះខ្ញុំ, ការអានសៀវភៅមួយក្បាលមិនចប់ ព្រោះតែខ្ញុំខ្លួនឯង យល់ថា អ្វីដែលខ្ញុំទទួលបានពីសៀវភៅមួយក្បាលនោះ វាគ្រប់គ្រាន់សម្រាប់ខ្ញុំក្នុងខណៈនេះ។ វាមានន័យថា អ្វីដែលខ្ញុំកំពុងអាន ជាអ្វីដែលខ្ញុំចាប់អារម្មណ៍ ហើយខួរក្បាលខ្ញុំទាមទារឱ្យអានបន្ត។ ប្រសិនបើខួរក្បាលខ្ញុំប្រាប់ថា វាមិនសំខាន់សម្រាប់ខ្លួនខ្ញុំ ខ្ញុំនឹងឈប់អាន ហើយទុកសៀវភៅនោះចោលភ្លាម។ ប៉ុន្តែ ថ្ងៃណាមួយ ខ្ញុំនឹងលើកសៀវភៅមួយក្បាលនោះ មកអានឡើងវិញ, អានដើម្បីរំលឹករឿងចាស់ៗ និង ដើម្បីទទួលយកអ្វីដែលថ្មី, អ្វីដែលខ្ញុំបានបោះចោលកាលពីពេលមុន។
បើតាមចាំបាន, អ្នកនៅម្ដុំៗនេះ ក៏ធ្លាប់សួរខ្ញុំដែរថា ហេតុអីបានជាអានសៀវភៅមិនចប់? ពេលនេះប្រហែលជាបាត់ឆ្ងល់ហើយ, ប៉ុន្តែនេះគ្រាន់តែជាគំនិតរបស់ខ្ញុំប៉ុណ្ណោះ, ទទួលបានឬមិនបាន សុំប្រាប់ខ្ញុំឱ្យដឹងផង ក្រែលលការយល់ឃើញរបស់ខ្ញុំនៅមិនទាន់សមស្រប, មិនទាន់មានលក្ខណៈទូទៅ។
បងយល់ស្រប។ សៀវភៅខ្លះ ទោះបីជាយើងបង្ខំឱ្យខ្លួនយើងឱ្យអានឱ្យចប់ ក៏ពិបាកនឹងបញ្ចប់ ដោយសារតែវាមិនត្រូវចិត្តរបស់យើង ឬមិនមែនជាអ្វីដែលយើងត្រូវការអាន តែសៀវភៅខ្លះ ទោះជាក្រាស់រាប់រាយ រាប់ពាន់ទំព័រក៏យើងនៅតែបន្តអានដោយយកចិត្តទុកដាក់ ដោយសារតែវាជាអ្វីដែលយើងចង់ដឹង ឬត្រូវការ។ ការអានសៀវភៅសម្រាប់បង បងមិនចង់បានឱ្យអានឱ្យចប់នោះទេ អ្វីដែលបងត្រូវការគឺចង់ស្វែងយល់បន្ថែម តែវាមានករណីខ្លះ ដែលបងត្រូវតែបង្ខំឱ្យអានវាឱ្យចប់ទាំងមិនចូលចិត្តសៀវភៅនោះ ដូចជាពេលដែលគ្រូកម្រិតឱ្យអានឱ្យចប់ ឬពេលដែលយើងត្រូវតែអានឱ្យចប់ក្នុងគោលដៅអ្វីមួយ។ សម្រាប់សៀវភៅដែលបងអានមិនចប់ គឺបានន័យថាបងមិនចាប់អារម្មណ៍ ឬវាមិនទាន់សំខាន់សម្រាប់បង តែបងក៏មិនទាមទារឱ្យចប់ដែរ គឺវាអាស្រ័យលើការយល់ឃើញរបស់បង។
New blog? Cannot read now.
គេអានបាន ម៉េចបងអានមិនបាន???
យី! បើប្រាប់ថាអានមិនបានហើយ នៅឆ្លើយតបឲ្យអានមិនបានទៀត…
ok អាឡូវអានបានហើយ… ហ៊ើយ អាការដែលគេសួរយើងថា «អានសៀវភៅហ្នឹងចប់ហើយនៅ?» គឺមានន័យថា បើចប់កាលណា នឹងអាលគេខ្ចីអានម្ដងហ្នឹងណា… ។ បឿន អើយ បើខ្ញុំវិញបើអានមិនចប់ ក៏ព្រោះតែអានវាមិនដាច់ អានមិនយល់ កិកិ បើសៀវភៅខ្មែរវិញ អានបណ្ដាក់ចង់ម៉ាខែបានចប់ម៉ាក្បាល អានខ្ទាស់ អានខ្ទាស់… និយាយទៅតភាគទាល់តែចប់ ។ {…}
ល្អិតល្អៀតល្អន់មែន! បងតាមមិនទាន់ទេ…
យល់ស្របតាមបងរដ្ឋ គេសួរដូច្នោះព្រោះគេចង់ខ្ចីត មានន័យថា យើងឈប់អានហើយឬនៅ អាចឲ្យគេខ្ចីអានផងបានទេ?
សម្រាប់បងអានសៀវភៅចង់ឲ្យតែចប់ឆាប់ៗហ្នឹង ព្រោះធ្វើអ្នកអានចង់អានឲ្យទាន់សៀវភៅដែលចេញថ្មី ព្រោះធម្មតាការបោះពុម្ពតែងតែយឺតយ៉ាវជាងអ្នកចាំតែអានហើយ តែបើអ្នកអានយឹតជាងការបោះពុម្ព យ៉ាប់គឺយ៉ាប់ ។ម្យ៉ាងអានសៀវភៅឲ្យឆាប់ចប់ ព្រោះចង់ដឹងថាសៀវភៅហ្នឹងមានសារសំខាន់ឬអត់ បើមាន លើកក្រោយនឹងអានជាថ្មីទៀត… តែប៉ុណ្ណឹងឯង!!!
ចេះមកបើកបណ្ណាល័យឯណា…រកតែសៀវភៅមួយគ្មាន
មនុស្សម្នាក់មានរបៀបអានរៀងៗគ្នា។ អ្នកខ្លះអានតាំងពីអរម្មណ៍កថាឬកថាមុខ
ឯអ្នកខ្លះទៀតអានតែកន្លែងសង្ខេបឫក៍សរុបសេចក្តី។
ចំណែកខ្ញុំវិញជាមនុស្សខ្ជិលអានផុតលេខ។ ខ្ញុំអានជូនមុខជូនក្រោយ ជូនក្រោយ
ជួយមុខ ត្រឡប់ចុះត្រឡប់ឡើងគ្មានលំដាប់។ ពោលគឺអាតតែកន្លែងចង់ដឹង
ក្រែងគ្នាទើបតែធ្វើដឹងអី!កុំអាលថាគាត់
មិនអញ្ចឹងបង
គួរអោយស្តាយ ដែលប្លកចាស់ ពេញដោយពត៌មានល្អ ត្រូវបានលុបចេញ!
សូមដាក់ឡើងវិញ ប្រកាស “ ដែនដីសុវណ្ណភូមិ” ព្រោះវិធីពណ៌នាសាមញ្ញ ងាយយល់ សំរាប់អ្នកអានគ្រប់ប្រភេទ ដូចបានឃើញផ្ទាល់ភ្នែកតែម្តង អ្វីដែលបានពិពណ៌នា ក្នុងសាច់រឿង។
គេសួរអញ្ចឹង ជាការគួរសមល្អបំផុតហើយ។ គេចង់ដឹងថាអូននៅអានទៀតរឺអត់ទេ បើទេ គេអាចខ្ចីបានក៏អត់។ ចំណែកការអានសៀវភៅ វាអាស្រ័យលើប្រភេទសៀវភៅ បើវាជាប្រភេទរឿងនិទាន អានពីដើមដល់ចប់ជាការល្អ ប៉ុន្តែបើជាសៀវភៅនិយាយពីជំនាញមួយៗ គួរតែជ្រើសរើសជំពូកណាដែលយើងមានចំងល់។ ការជ្រីសរើសសៀវភៅមកអាន គេត្រូវមើលពីសេចក្ដីសង្ខេប អ្នកនិពន្ធ ឆ្នាំចេញផ្សាយ និង រោងពុម្ព ជាមុន។ ទ្វើអញ្ចឹង ចំណេញពេល និង ថវិការ។
អរគុណបង!
មិនអីទេ។
ពិតជាមានន័យមែន រកពាក្យនិយាយទៅកើត ល្អណាស់
hey, lady when will you finish it? if you can scan to complete this , send the book to me i’ll do for you ok ? thanks for your hard work !
I really agree with you what you said in this text
because I sometimes like that too…..
បើនិយាយពីអានសៀវភៅវិញ, ប៉ុន្មានខែហ្នឹងដូចជាអត់មានអារម្មណ៍អានសៀវភៅសោះ ។ ជាពិសេសសៀវភៅមេរៀន ។ អម្បាញ់មេញហ្នឹងទើបនឹងអានសៀវភៅនីតិរដ្ឋបាលទូទៅ (Mémentos : Droit Administratif Général) ដែលមានកម្រិតទាបបំផុត នៅតែអានអត់យល់ ។ ដល់តែអញ្ចឹងទៅ ឃើញសៀវភៅដូចចង់ខ្លាច ។ ឆ្នាំហ្នឹងបែបត្រូវប្រឡងសងហើយ ។